jueves, 15 de abril de 2010

Publicam um sítio web para assinar em favor da nulidade dos juízos políticos praticados polo fascismo no nosso País


14/04/2010
Transferência de presos políticos galegos para o campo de concentraçom de Sam Simom (Ria de Vigo, anos 40).

Nesta semana fijo-se público na Internet a declaraçom titulada “Recolhida de assinaturas para que o Governo espanhol declare a nulidade dos juízos políticos do franquismo”. O texto editado em normativa oficialista e reintegracionista parte de constatar o fracasso que supugérom as sucessivas tentativas da família do antifascista galego Xosé Humberto Baena Alonso para lograr a nulidade do juízo militar em que foi condenado a fusilamento em 1975. Aliás, a declaraçom exige, por extensom, que o Executivo de Madrid anule a validez de todos os juízos políticos do fascismo “como fijo a Alemanha em 2005 com os juízos do nazismo”.

A iniciativa legal destaca como “a Lei de Memória Histórica de 2007 (...) nom saldou a dívida pendente do Estado com as vítimas de graves violaçons dos direitos humanos como torturas, desapariçons e execuçons extra-judiciais” e denuncia “a sua insuficiência e a impunidade na que deixa os assassinatos de Estado”, pondo como máximo exemplo o caso da família de Baena Alonso. Finalmente, a declaraçom exige ao Governo espanhol o estabelecimento dumha Comissom da Verdade que cartografie o mapa da repressom fascista entre 1936 e 1976 e, por outra parte, “anule os juízos injustos do franquismo mediante umha lei específica”.

“Democracia a la española”

Por parte de Ceivar, alentamos a assinar massivamente esta declaraçom dando-lhe a máxima difusom possível no País. Queremos destacar aliás o significativo facto de que, a 35 anos do assassinato de Estado de Xosé Humberto Baena Alonso, a “democracia a la española” tenha pendentes asignaturas tam primárias para qualquer regime pretensamente democrático como a condena da repressom selvagem dessatada sobre o Povo Galego nessa fase histórica. Temos a conviçom de que a carência nom é casual: responde à natureza do regime monárquico e anti-democrático surgido do pacto entre o fascismo e sectores da oposiçom decididos a manter os peares essenciais do regime franquista.

Anexamos ao pé desta informaçom a ligaçom onde se apresenta a citada declaraçom e a possibilidade de assiná-la individualmente.

Mais informaçom: http://www.peticao.com.pt/franquismo

No hay comentarios: